‘Zungu la unga’ auawa mahakamani akijaribu kuwatoroka askari

>Ilikuwa kama sinema. Raia wa Sierra Leon, Abdul Koroma (33) aliyekuwa akikabiliwa  kesi ya

Dar es Salaam. Ilikuwa kama sinema. Raia wa Sierra Leon, Abdul Koroma (33) aliyekuwa akikabiliwa  kesi ya kuingiza dawa za kulevya nchini zenye thamani ya Sh61.4 milioni alipouawa kwa risasi katika Mahakama ya Hakimu Mkazi Kisutu wakati akijaribu kutoroka chini ya ulinzi wa askari wa Magereza.

Tukio hilo lilitokea jana saa 2.45  asubuhi baada Koroma kutoka katika Gereza la Keko na kufikishwa mahakamani.

Mashuhuda wa tukio la kuuawa kwa mshtakiwa huyo ambaye alikamatwa na dawa hizo katika Uwanja wa Ndege wa Kimataifa wa Julius Nyerere akitokea Brazil, walisema kabla ya kifo chake alimwomba askari ampeleke chooni.

Bila kutaja majina, walisema akiwa chooni, Koroma alivua suruali yake ya jeans na kuitumia kutoroka kwa kujikinga na chupa zilizozunguka ukuta wa eneo la choo hicho na kuruka upande wa pili na kutimua mbio.

Walisema alikimbia akiwa amevaa kaptula  akipita katika kichochoro kilichopo kati ya Mahakama hiyo na mgawahawa  uliopo ndani ya uzio.

Mmoja wa askari Magereza alimuona na kuwaeleza wenzake ndipo walipoanza kumkimbiza.

Walisema Koroma alitahadharishwa kusimama kwa hiari yake kwa kupiga risasi moja hewani, lakini Koroma hakutii amri.

 Wakati yote hayo yakiendelea, askari Magereza aliyekuwa na silaha alilazimika kumpiga risasi ya shingo na kufa papo hapo.

Mmoja wa askari alisema iwapo askari huyo asingekuwa mwangalifu kwa kuipiga risasi hiyo, angesababisha madhara kwa watu wengine.

Saa moja baada ya tukio hilo lilotokea saa mbili asubuhi, polisi walifika eneo hilo wakiwa na magari matatu aina ya Landrover Defender na moja aina ya Noah zote zikiwa zimebeba askari waliokuwa wamevalia kiraia pamoja na  machela na kuunasua mwili wa marehemu juu ya uzio na kuondoka nao.

Pamoja na tukio hilo, kesi yake namba 21 ya mwaka 2013 iliyofikishwa mahakamani hapo Desemba 2, 2013 ambayo hadi jana upelelezi wake ulikuwa  haujakamilika, iliendelea.

Kesi hiyo jana  ilitajwa mbele ya Hakimu Hellen Liwa na Wakili wa Serikali, Leonard Challo alitoa taarifa mahakamani hapo kuhusu tukio hilo.

Alisema  wanasubiri hati ya kifo cha ili wafunge faili la mashtaka yaliyokuwa yakimkabili.