Wanawake ‘wapiga jaramba’ urais 2015

Mkurugenzi wa Kituo cha Sheria na Haki za Binadamu (LHRC), Dk Hellen Kijo-Bisimba .

Dar es Salaam. Wakati joto la kisiasa likiendelea kupanda kila siku, makundi mbalimbali ya wanawake yanaendesha kampeni za chinichini nchi nzima kuhakikisha kuwa anapatikana rais mwanamke katika Uchaguzi Mkuu utakaofanyika Oktoba mwaka huu.

Makundi hayo yanayoongozwa na wanawake wasomi na wanasiasa yamo katika kinyang’anyiro hicho ambacho hatima yake ni Oktoba mwaka huu.

Kampeni zinazofanyika sasa, ni kuhakikisha jina la mwanamke linapitishwa na wanawake wote bila kujali itikadi, kumpigia kura.

Umoja wa Wanawake Wanasiasa nchini (Ulingo), Mtandao wa Wanawake na Katiba, Kituo cha Sheria na Haki za Binadamu (LHRC) na wadau wengine ndiyo walio mstari wa mbele kuhakikisha kuwa azma hiyo inafikiwa.

Mkurugenzi wa Kituo cha Sheria na Haki za Binadamu (LHRC), Dk Hellen Kijo-Bisimba alisema kuwa walikwisha kuanza kampeni hizo tangu Septemba 2014 kupitia mradi wa ‘Wanawake na Uchaguzi’ huku wakiwa tayari wamefika kwenye mikoa 15.

“Uzoefu wetu unaonyesha kuwa mwaka huu wa uchaguzi una nafasi kubwa kwa mwanamke ikilinganishwa na 2005/10,” alisema Bisimba.

Dk Bisimba alitaja mikoa waliyofanikiwa kuendesha mradi huo kuwa ni Mtwara, Mwanza, Dar es Salaam, Mara na Ruvuma. Aliongeza kuwa mwaka 2000, CCM iliwakatisha tamaa wanawake walioonyesha nia ya kuwania urais.

“Mwaka huu ngoja tuangalie, maana kuna wanawake wengi wenye uwezo kama tulivyoshuhudia kwenye utendaji wao, uadilifu, uzoefu na busara za kuongoza hata taifa hili,” alisema Dk Bisimba na kuongeza:

“Kwa hivyo tunaratajia kuona vyama vikubwa vikitoa nafasi sawa kwa wanawake bila upendeleo au kuendekeza rushwa.”

Aliyekuwa Mkurugenzi Mtendaji wa Mtandao wa Jinsia Tanzania (TGNP), Usu Mallya alisema atakuwa tayari kuendesha kampeni hizo kwa mwanamke yeyote atakayejitokeza bila kujali itikadi za chama anachotokea.

Naye Mwenyekiti wa Ulingo, Anna Abdallah alimwambia mwandishi wa gazeti hili kuwa, umoja huo umeshajiandaa kuendesha kampeni ya pamoja na kwamba unasubiri kupulizwa rasmi kwa kipenga cha kampeni.

Mama Anna alisema katika uchaguzi huo, wanawake hawatakuwa tayari kuendelea kubakia kwenye majukwaa kuwapigia kampeni wanasiasa wanaume peke yao, badala yake wameamua kuchukua hatua hiyo kutokana na uwezo na utashi wa wanawake uliopo hivi sasa.

Mama Anna Abdallah aliyewahi kuwa kama Mwenyekiti wa Jumuiya ya Wanawake (UWT), alisema kwa miaka mingi wanawake wamekuwa wakiwawezesha wanaume kuingia Ikulu, lakini mwaka huu hali itakuwa tofauti.

“Miaka yote sisi wanawake ndiyo tumekuwa na mchango mkubwa wa kuwaingiza madarakani, lakini kwa mwaka huu lazima tupate nafasi ya mwanamke ambaye atasimama kuonyesha uwezo wa kushika madaraka katika nafasi hiyo ya juu,” alisema.

Alisema: “Kwa kutumia wingi na ushawishi wetu kama ilivyokuwa kwenye Bunge Maalumu la Katiba (BMK) ndiyo tutakavyoendeleza kampeni hizo kwenye uchaguzi mkuu.” Alisema na kuongeza; Ulingo itashirikiana na mtandao wa wanawake na Katiba kufanya kampeni hiyo.

Alipoulizwa ni majina gani mpaka sasa wameshayapendekeza, Mama Anna alisema kuwa bado hawajafanya tathmini hiyo, lakini endapo majina yatapatikana watamuunga mkono kwa nguvu zote mwanamke mwenye uwezo.

Naibu Katibu Mkuu wa Chama cha Wananchi (CUF) Bara, Magdalena Sakaya alisema bila kujali itikadi za vyama, atakuwa tayari kuunga mkono mwanamke yeyote atayejitokeza kuwania nafasi hiyo ya urais mwaka huu.

“Ulingo inaunganisha wanawake wa vyama karibu vyote vya siasa nchini, kwa hivyo endapo watafanikiwa kwa umoja huo, jamii itakuwa tayari kuunga mkono harakati hizo, kwani mwanamke ni zaidi ya uchumi katika taifa lolote linalohitaji kupiga hatua,” alisema Sakaya.

“Pia kuna baadhi ya taasisi na mashirika mengi tu ambayo yameshaanza harakati za kuwainua wanawake, kuwajengea ujasiri kwa hivyo tumaini lipo kubwa, lakini vyama ndiyo vinatakiwa kutoa ushirikiano wa kutosha. CUF iko tayari na vyama vingine vijipange kuwaunga mkono watakaojitokeza.”

Nafasi ya wanawake Tanzania

Kwa mujibu wa sensa ya mwaka 2012, inaonyesha kuwa idadi ya Watanzania ni milioni 45, kati yao wanawake ni milioni 23 na wanamume ni milioni 21.9. Tanzania Bara ina wanamume milioni 21.2 na wanawake milioni 22.4 na Zanzibar ina wanamume 630,677 na wanawake 672,892.

Idadi hiyo inadaiwa kuwa ni mtaji mkubwa kwa wanawake katika harakati walizoanzisha kuelekea uchaguzi huo.

Kutokana na nafasi hiyo, harakati hizo kupitia kwa wabunge wote wanawake kutoka CCM, wanachama, wanaharakati na taasisi zinazounga mkono mapinduzi ya mwanamke nchini, wamedhamiria kuleta changamoto kubwa ya kushawishi jamii ikubaliane na harakati hizo.

Anna Senkoro alifungua pazia

Katika uchaguzi wa urais na ubunge mnamo Desemba 4, 2005, Anna Senkoro, (PPT-Maendeleo), alikuwa mwanamke pekee aliyeingia kwenye kinyang’anyiro hicho.

Anna aliyeshika nafasi ya nane kati ya wagombea 10 waliokuwa wakiwania kiti hicho na kuambulia asilimia 0.17 ya kura zote zilizopigwa.

Akizungumzia hali hiyo, Malya alisema mfumo kandamizi uliopo nchini ndiyo sababu ya wanawake kushindwa katika chaguzi.