Rais Kikwete amteua Masaju kuwa Mwanasheria Mkuu wa Serikali

Dar es Salaam. Rais Jakaya Kikwete amemteua George Masaju kuwa Mwanasheria Mkuu wa Serikali, akichukua nafasi iliyoachwa na Jaji Frederick Werema aliyejiuzulu Desemba 16 kutokana na kuhusishwa na kashfa ya Akaunti ya Tegeta Escrow.

Kwa mujibu wa taarifa ya Kurugenzi ya Mawasiliano ya Ikulu uteuzi huo ulianza rasmi  Ijumaa, Januari 2, 2015 na anatarajiwa kuapishwa kesho.

Kabla ya uteuzi wake, Masaju alikuwa Naibu Mwanasheria Mkuu wa Serikali na aliwahi pia kuwa Mshauri wa Sheria wa Rais wa Jamhuri ya Muungano wa Tanzania.

Katika barua yake ya kujiuzulu kwa Rais, Jaji Werema alisema kuwa alifikia uamuzi huo kwa sababu; “Ushauri wake kuhusiana na suala la Escrow haukueleweka na umechafua hali ya hewa.”

Uamuzi wa Werema ulitokana na maazimio ya Bunge ya kutaka yeye na baadhi ya vigogo wachukuliwe hatua kutokana na madai ya kuhusika kwenye sakata la uchotwaji fedha katika akaunti hiyo.

Mwanasheria huyo alilalamikia maazimio hayo, akisema hayakuwa ya haki kwa wote waliotuhumiwa na uamuzi huo ulifanywa kwa hasira na kufuata mkumbo.

Bunge liliazimia Jaji Werema kushughulikiwa kwa mujibu wa sheria kutokana na kuipotosha Serikali kuhusu malipo ya Sh306 bilioni kutoka Akaunti ya Tegeta Escrow, akishauri fedha hizo zilipwe kwa Kampuni ya IPTL iliyo na mkataba wa ufuaji umeme na Tanesco bila ya kukata kodi.

Jaji huyo hakusalimu amri wakati Bunge likijadili tuhuma dhidi yake, akisema anaamini alichofanya na kutaka abebeshwe msalaba.