Kafulila: Ni zamu ya wapinzani kushika dola

Mbunge wa Kigoma Kusini, NCCR-Mageuzi, David Kafulila.

Uyole. Mbunge wa Kigoma Kusini, NCCR-Mageuzi, David Kafulila amesema kama upinzani utashindwa kuchukua nchi mwaka huu, basi CCM itaendelea milele kuongoza Tanzania.

Oktoba mwaka huu, Tanzania inaingia kwenye kinyang’anyiro cha uchaguzi wa rais, wabunge na madiwani baada ya Rais Jakaya Kikwete kumaliza muda wake.

Akihutubia Mkutano wa hadhara uliofanyika Shule ya Msingi, Hasanga Uyole, mkoani Mbeya, Kafulila alisema kuwa Watanzania wataendelea kuwa maskini huku keki ya Taifa ikiliwa na vigogo wachache.

“Huu ni wakati wa kujiangalia...watu wanalalamika kila siku, hali ya umaskini inaongezeka na kila kukicha ni kilio, sasa ni wakati wa kufanya uamuzi,” alisema Kafulila.

Alisema umaskini wa Mtanzania umechangiwa kwa kiasi kikubwa na wezi wa rasilimali za nchi, huku Watanzania walio wengi wakitaabika.

“Mimi nasema, upinzani ukiingia Ikulu haya yote yatamalizika, kila Mtanzania atafurahia rasilimali zake, lakini wakiing’ang’ania CCM watabakia hivyo,” alisema.

Kafulila alisema kuwa ikiwa watashindwa kuitoa CCM na ikafanya vizuri katika kila eneo, Watanzania hasa wapinzani watabaki kwenye uongozi wa mitaa, vijiji na vitongoji walivyopata katika uchaguzi uliopita kwa miaka mitano mingine.

Akizungumzia sakata la uchotwaji wa fedha katika Akaunti ya Escrow, Kafulila alirudia kusema kuwa pamoja na kuibuliwa wachache, lakini kuna msururu mrefu wa wahusika.

Kafulila alisema kuwa pamoja na Rais Kikwete kumfuta kazi Waziri wa Ardhi, Nyumba na Maendeleo ya Makazi, Profesa Anna Tibaijuka bado hajakata kiu ya Watanzania kuwatimua wengine.

Profesa Tibaijuka aliondolewa kwenye wadhifa wake baada ya kujipatia Sh1.6 bilioni kutoka kwenye akaunti ya Escrow.

Akimzungumzia Waziri wa Nishati, Profesa Sospeter Muhongo, Kafulila alisema Rais hajakata kiu ya Watanzania kwa kushindwa kumchukulia hatua Muhongo.

“Huu mtandao wa uchotwaji fedha unafahamika, sasa kwa nini Ikulu inakuwa na kigugumizi dhidi ya Profesa Muhongo?” alihoji.

Kafulila alielezea wasiwasi wake kuwa Profesa Muhongo huenda asiondolewe kwa njia za kawaida, lakini anaweza kuondolewa kwa mashinikizo kwa vile Rais hana nia ya kumwondoa licha ya kukubali kuyafanyia kazi maazimio ya Bunge.