UHALIFU: Mbaroni kwa ubakaji Kigoma

Kigoma. Kiongozi mmoja wa dini anayejihusisha na uganga wa jadi anashikiliwa na polisi kwa tuhuma za kumbaka mwanafunzi wa darasa la sita katika Shule ya Msingi Ujiji iliyopo katika Manispaa ya Kigoma Ujiji.

Kamanda wa Polisi Mkoa wa Kigoma, Jafari Mohamed alikiri kiongozi huyo anayedaiwa ni mtoa mawaidha katika Msikiti wa Wagoma uliopo Ujiji mjini Kigoma alikamatwa baada ya kumbaka Mtoto mwenye umri wa miaka 14.

Alimtaja mtuhumiwa ni Hassan Bamba (42) ambaye licha ya kuwa mganga wa jadi, amekuwa akitumia nyumba yake iliyopo Ujiji kuwabaka kina mama wanaokwenda kwake kutafuta tiba.

Akisimulia mkasa huo, mtoto aliyebakwa, mwenye umri wa miaka 14 (jina linahifadhiwa), alisema alifika nyumbani kwa Bamba Januari 1, 2015 kuchukua dawa za kumuwezesha kusoma kwa bidii kama walivyoelekezwa na mtuhumiwa.

Baada ya kumtuma Shule ya Sekondari Kitongoni kuchukua mchanga katika vichupa vidogo viwili, alipofika alimwambia aingie chumba cha kutibia wagonjwa na kumwamuru avue nguo za ndani.

“Nilikataa, akanikamata kwa nguvu na kunivua nguo zangu, halafu akachukua mafuta ya mgando akachanganya na dawa nyeusi, akaanza kunibaka,” alisimulia mtoto huyo huku akilia.

Anadai licha ya kupiga kelele lakini sauti haikutoka kwa vile nyumba hiyo ina madirisha ya vioo yasiyopenyeza sauti nje kwa urahisi.

Kabla ya kumbaka binti huyo inadaiwa alitaka kumbaka ndugu yake waliozaliwa pacha, lakini alishindwa baada ya mtoto huyo kuwahi kukimbia na kurudi nyumbani kwao.

Binti huyo alisema siku mbili kabla ya kumbaka, mganga huyo aliwafunga kamba kiunoni na zilitolewa Desemba 31, 2014 akidai ni sehemu ya tiba.

Baba wa binti aliyebakwa, Athuman Omary alisema Desemba 27, 2014 akiwa na watoto wake wakienda shule alikutana na Bamba aliyeanza kuhoji juu ya watoto na kuomba awatengenezee dawa ya kuwafanya wafaulu mitihani kwa daraja la juu.

“Nilimwambia hakuna tatizo kama ataweza kwa vile ni jambo la kielimu. Akaniomba nitafute madafu sita ili wanangu wakaanze tiba, na Jumapili ya tarehe Desemba 28, 2014, tiba ikaanza,” alisema Omary.

Licha ya baadhi ya viongozi wa dini kuendesha vikao vya kutaka suala hilo limalizwe nje ya mahakama kwa madai ya kuficha aibu ya mganga huyo wa jadi, familia ya mtoto huyo imekataa.

Bibi ya mtoto, Mwamvua Hamisi aliisema kitendo hicho kimedhalilisha familia yao na wanaomba vyombo vya dola vichukue hatua na kuamua kwa haki bila upendeleo wowote.