Kanisa Katoliki latoa msimamo Katiba Mpya
Rais wa Tanzania, Dk Jakaya Kikwete na Rais wa Zanzibar, Dk Ali Mohamed Shein, kwa pamoja wakikata utepe kuzindua rasmi Rasimu ya Katiba inayopendekezwa baada ya kukabidhiwa.
Dar es Salaam. Kanisa Katoliki nchini limeanza rasmi mkakati
wa kutoa elimu kuhusu Katiba Inayopendekezwa kwa waumini wake, kutokana
na kuondolewa kwa mambo mengi ya msingi yaliyotolewa maoni na wananchi.
Mkakati
huo umeanzia katika Jimbo la Mwanza ambapo imedaiwa kuwa Askofu Mkuu wa
Jimbo Kuu la Mwanza, Juda Thaddeus Ruwai’chi ameunda kamati maalumu
iliyopewa jukumu la kuchambua na kutoa ufafanuzi juu ya Katiba
Inayopendekezwa katika makanisa yaliyopo katika jimbo hilo kupitia
semina mbalimbali.
Kura ya Maoni ya kupitisha Katiba
hiyo inatarajiwa kufanyika Aprili 30, mwaka huu (siku 45 kuanzia leo),
katika mkakati huo kanisa hilo limeainisha mambo 100 yaliyotolewa maoni
na wananchi lakini yakaondolewa.
Uongozi wa kanisa hilo
umekiri kuwapo kwa maelekezo hayo yakiwa na lengo la kutoa elimu kwa
waumini wake kuhusu mambo yaliyomo na yasiyokuwamo kwenye Katiba
Inayopendekezwa.
Kanisa hilo kupitia Tume ya Haki na
Amani ya Tec limekuwa linatoa matamko mbalimbali kuhusu mchakato huo,
likiwamo lile la Machi mwaka jana la kupendekeza Serikali tatu,
lililosababisha Askofu Mkuu wa Jimbo Mkuu la Dar es Salaam, Mwadhama
Polycarp Kardinali Pengo kuibuka siku mbili baadaye na kusema msimamo
huo siyo wa Kanisa Katoliki nchini.
Katika tamko hilo
tume hiyo chini ya Askofu Mkuu wa Tabora, Paulo Ruzoka, CPT ilikuwa
imeeleza kuwa muundo wa Serikali mbili haukutatua matatizo ya msingi na
badala yake ulilimbikiza kero zilizosababisha Zanzibar kujiundia katiba
yake mwaka 2010 bila kushauriana na Tanzania Bara.
Akifafanua
tamko hilo siku mbili baadaye, Kardinali Pengo, alisema “Maoni ya Tume
hayawezi kuwa ni msimamo wa kanisa. Kanisa Katoliki lina utaratibu wa
kutoa misimamo yake na huwa inatolewa na Mwenyekiti wa TEC.”
Kauli ya Rais Tec
Akizungumza
na gazeti hili jana kuhusu mpango huo, Rais wa Baraza la Maaskofu
Tanzania (TEC), Askofu Tarcisius Ngalalekumtwa, alisema lengo la mkakati
huo ni kuhakikisha waumini wa kanisa hilo wanaijua Katiba
Inayopendekezwa ili waweze kukipigia kura kitu wanachokifahamu.
“Kama
watapiga kura ya ‘Ndiyo’ au ‘Hapana’ hiyo ni juu yao wao. Sisi
tunachokifanya ni kuwaeleza Katiba hii ina mambo gani,” alisema huku
akisisitiza kuwa katiba yenyewe wananchi wengi hawaijui hadi sasa.
Kilichotokea Mwanza
Wajumbe
watatu wa kamati hiyo wakizungumza katika mkutano uliofanyika katika
Parokia ya Nyakato jana walisema kuwa wameombwa na Askofu Ruwai’chi
kutoa elimu kuhusu mambo 40 yaliyopuuzwa na kuondolewa katika Katiba
Inayopendekezwa.
Wakisoma mambo 40 waliyodai kuwa
wameyachambua kutoka katika mambo muhimu 100 yaliyopuuzwa na kuondolewa
katika Rasimu ya Katiba pamoja na kasoro zilizojitokeza katika Bunge la
Katiba, wajumbe hao walisema baadhi ya watu wakielewa mambo hayo
wataweza kuwaeleza waumini wenzao.
“Kuna mambo 100 yaliyopendekezwa na wananchi lakini
kanisa limeyachambua kwa kifupi na kupata mambo 40 ambayo yatasomwa ili
watakaosikia waweze kuamua watapiga kura ipi siku ikifika,” alisema
Deusdedit Kagashe kwa niaba ya wajumbe wawili wa kamati hiyo, Domician
Saganya na Asnath Lyakulwa.
Walisema Kanisa Katoliki
linapingana na mchakato wa kupata Katiba Mpya kwa sababu mchakato huo
ulikosa maridhiano na ulilenga kundi la watu wachache.
Kati
ya mambo 40 yaliyoanishwa ni pamoja na kuongezwa kwa ukubwa wa Baraza
la Mawaziri wakati Iliyokuwa Tume ya Mabadiliko ya Katiba ilipendekezwa
baraza dogo la mawaziri pamoja na idadi ndogo ya wabunge.
“Upigaji
wa kura ya siri na wazi lilikuwa tatizo, kujiuzulu kwa Mwanasheria Mkuu
wa Zanzibar, wajumbe kuruhusiwa kupiga kura wakiwa nje ya Bunge,”
inaeleza sehemu ya kasoro 40 za upatikanaji wa Katiba Inayopendekezwa.
Awali,
Padri Baptist Mapunda alisema katika mahubiri yake kwamba kanisa haliko
tayari kuona Katiba ikipitishwa na wachache na kuyataka majimbo mengine
kuiga mfano wa jimbo la Mwanza.
Aliomba vichapishwe
vitabu vidogo vyenye mambo hayo 40 ili visambazwe katika jumuiya
ndogondogo ili waumini waweze kusoma na kuelewa.
Jijini
Dar es Salaam, Tume ya Haki na Amani (CPT) kwa kushirikiana na Tec,
imetoa waraka ikipendekeza kusitishwa kwa mchakato wa kura ya maoni ili
kupisha maandalizi ya Uchaguzi Mkuu kwa sababu Katiba Inayopendekezwa
imepatikana kwa njia zilizojaa utata mwingi wa kisheria, maadili na
ukosefu wa maridhiano ya kitaifa.
Tume hiyo ilitoa
mapendekezo hayo katika mkutano wake wa Kitaifa uliofanyika Februari 24 –
25 mwaka huu katika Kituo cha Mbagala jijini Dar es Salaam wakati
ikijadili mchakato wa Katiba na Kura ya Maoni.
“Katika
hali hii, mkutano unaazimia kwamba: Ama mchakato usitishwe mpaka baada
ya Uchaguzi Mkuu ambapo hatua stahiki zitachukuliwa. Au, kama mchakato
hautaahirishwa, kwa kuzingatia Tamko la Tume ya Haki na Amani la Novemba
2014, wananchi wahamasishwe kupiga kura ya “hapana” kwenye Kura ya
Maoni,” ulisoma waraka huo uliochapishwa na gazeti la TEC la Kiongozi.
Kasoro
Baadhi
ya kasoro zilizoelezwa katika waraka huo ni kukiukwa kwa Sheria ya
Mabadiliko ya Katiba na ile ya Kura ya Maoni na jinsi tarehe ya kura
hiyo ilivyotangazwa na usambazaji usioridhisha wa katiba
Inayopendekezwa.
Tume hiyo imesema kuwa kasoro za
mchakato huo zinadhihirisha ukiukwaji wa hali ya juu wa Sheria ya
Mabadiliko ya Katiba uliosababisha kupitishwa kwa Katiba Inayopendekezwa
kwa njia na misingi iliyojaa utata mwingi wa kisheria, maadili na
ukosefu wa maridhiano, muafaka na mshikamano dhati wa kitaifa.
Katika
mkutano huo, Tume hiyo ilizingatia umuhimu wa kukamilika uandikishaji
wapigakura katika Daftari la Kudumu la Wapigakura na Tume ya Taifa ya
Uchaguzi kutumia uwezo na muda wa kutosha kutimiza wajibu wake ndani ya
muda uliobaki.
