Kikwete: Vyuo vikuu visitegemee wahadhiri ‘wazee’

Rais Jakaya Kikwete amevitaka vyuo vikuu nchini kuwaandaa vijana kuwa wahadhiri badala ya kutegemea wastaafu.

Kikwete alisema hayo juzi usiku, katika harambee ya kuchangia fedha Chuo Kikuu Kishiriki cha Tumaini (Tudarco) iliyofanyika katika ukumbi wa Diamond Jubilee jijini Dar es Salaam ambapo Sh 1.6bilioni zilipatikana.

Alisema kuwa vijana zaidi wanahitajika kutoa elimu katika vyuo vikuu nchini ili kupunguza uhaba mkubwa wa wataalamu wa kada hiyo.

“Ajirini wahadhiri wenye damu changa, tusiwategemee wastaafu peke yao kuwa katika kada hii. Utegemezi wa wahadhiri wastaafu liwe jambo la mpito tu katika vyuo vyenye sifa,” alisema Rais Kikwete.

Hata hivyo, ushauri huo wa Rais Kikwete wa kutaka vyuo viajiri vijana zaidi umepokewa kwa hisia tofauti na baadhi ya wahadhiri. Mhadhiri wa Chuo Kikuu cha Dar es Salaam, Profesa Jamidu Katima, alisema suala hilo lina sura mbili kwani wahadhiri wazee wamefanya mengi kama tafiti, machapisho na wamekaa muda mrefu katika taaluma tofauti na wahadhiri vijana.

“Upande wa pili ni kweli kuwa, ingawa wahadhiri wazee wamefanya mengi, wahadhiri vijana nao wanahitajika ili kuziba mianya ya uhaba iliyopo,” alisema Profesa Katima.

Alisema wakati mwingine vyuo huona gharama kubwa kusomesha vijana, badala yake huwatumia wahadhiri ambao tayari wamestaafu.

Kwa upande wake, Mhadhiri wa Chuo Kikuu Huria Tanzania (OUT), Dk Emmanuel Malya alisema ingawa wahadhiri vijana ni wazuri, ni wachache hapa nchini.

“Serikali iwekeze katika kuwasomesha maprofesa, ni gharama lakini ni vizuri kwa sababu kuna uhaba mkubwa wa vijana katika kada hii,” alisema Dk Malya.

Alisema ni vigumu kuwapata wahadhiri vijana wenye shahada za uzamivu (PhD) na hata hao wenye shahada moja ni wachache wenye alama nzuri zinazohitajika katika kufundisha.

Mbali na ushauri huo, Rais Kikwete pia amevitaka vyuo vikuu kuwa na vifaa vya kufundishia kozi mbalimbali huku akisisitiza vyuo kuwa na vyanzo vingine vya mapato badala ya kutegemea ada za wanavyuo.

“Chuo kinatakiwa kijiendeshe chenyewe na ada za wanafunzi ziwe tu sehemu ya mapato ambayo yataimarisha zaidi chuo. Ni lazima kuwe na vyanzo vingine vya mapato zaidi ya ada,”alisema.

Kwa upande wa mchango wa serikali katika elimu ya juu Kikwete alisema serikali inatoa mikopo kwa wanafunzi wote kutoka shule binafsi na za serikali, huku wale wa masomo ya sayansi wakipata kipaumbele zaidi.

“Serikali inagharamia taasisi zote za elimu ya juu kwa kutoa mikopo kwa wanafunzi. Wanapata mikopo wale wanaochukua masomo ya sanaa na sanaa ya jamii,” alisema na kuongeza:

“Hatuna budi kuzalisha wanasayansi wa ndani, tukitegemea wanasayansi kutoka nje, tutaaibika kwa sababu usipofuata masharti yao tu, wanaondoa misaada yao.”

Aidha, Rais Kikwete alisifu Tudarco kuwa kimekuwa mfano mzuri katika masuala ya nidhamu tangu kuanzishwa kwake na kimeshajijengea sifa kubwa nchini.