Chadema yatetea wanahabari
Chama cha Demokrasia na Maendeleo (Chadema) kimeungana na
wadau wa sekta ya habari nchini kupinga usiri na udharura unaotaka
kufanywa na Serikali katika miswada miwili muhimu inayogusa masilahi ya
mwananchi mmoja mmoja na makundi ya wadau mbalimbali katika jamii.
Kwa
mujibu wa tarifa iliyotolewa jana na Mkuu wa Idara ya Habari na
Mawasiliano ya chama hicho, Tumaini Makene ameeleza kuwa kwa takriban
wiki moja sasa zipo taarifa (za uhakika) kwamba Serikali inapanga
kuwasilisha bungeni kwa hati ya dharura miswada miwili; Muswada wa
Sheria ya Kupata Habari wa Mwaka 2015 na Muswada wa Sheria ya Huduma ya
Vyombo vya Habari wa Mwaka 2015.
“Usiri na udharura huu
kwenye jambo linalogusa haki za Watanzania halikubaliki. Tunatumia
fursa hii kuungana na wadau mbalimbali wa habari nchini kupinga mipango
hiyo ya Serikali kutaka kulitumia Bunge kupitisha miswada hiyo kisha
kutunga sheria bila kutoa fursa kwa wadau kutoa maoni yao ili kuboresha
miswada hiyo,”alisema Makene katika tarifa hiyo.
Alisema
haki ya wananchi kupata taarifa na uhuru wa vyombo vya habari mbali ya
kugusa haki za mtu mmoja mmoja na makundi ya kijamii kitaaluma na
kikazi, ni moja ya misingi muhimu kwa Taifa lolote ambalo linataka
kuweka mifumo na taasisi imara kwa ajili ya maendeleo ya demokrasia na
ustawi wa jamii.
Makene alisema Chadema, kikiwa taasisi
ya kisiasa iliyotia saini Azimio la Dar es Salaam la Uhuru wa Uhariri
na Uwajibikaji, kikiamini katika uwajibikaji lakini pia dhana kwamba
wadau wa habari ni pamoja na vyama vya siasa na makundi mengine katika
jamii, kinapinga vikali hatua hiyo ya Serikali kutumia hati ya dharura
kuwasilisha jambo linalohitaji maoni ya wananchi kwanza.
Taarifa
hiyo ya Chadema inaunga mkono tamko lililotolewa katikati ya wiki na
wadau mbalimbali wa vyombo vya habari nchini wakipinga hatua ya Serikali
kutaka kuwasilisha miswada hiyo miwili kwa hati ya dharura jambo ambalo
halitatoa nafasi kwa wadau kutoa maoni yao.Katika taarifa ya Chadema
jana, Makene ameleza kuwa, “Serikali hii ambayo imekuwa na tabia ya
kuhalalisha ukandamizaji wa uhuru wa maoni na vyombo vya habari
(mathalan kufungia magazeti ya Mwanahalisi, The East African) haiwezi
kuaminika kupeleka muswada kwa ajili ya Sheria ya Huduma ya Vyombo vya
Habari, kwa usiri siri na udharura wa kutengenezwa.”
Alisema
usiri huo na udharura unaotaka kutumika kupitisha sheria bila maoni ya
wananchi ni mwendelezo wa kukosekana kwa nia njema ya Serikali dhidi ya
wadau wa uhuru wa habari nchini ambao itakumbukwa wamekuwa wakipigania
kuwapo kwa sheria hizo kwa takriban miaka 10 sasa.
Juzi,
jopo la wadau wa habari kutoka asasi, taasisi na vyombo vya habari
nchini, lilipanga kuwatumia wabunge kuwashawishi wakatae kupitisha
muswada wa sheria ya habari uliopangwa kuwasilishwa bungeni kwa hati ya
dharura.
Hatua hiyo inatokana na mipango ya Bunge hilo kuweka
ratiba ya uwasilishaji wa miswada miwili ya habari kwa njia ya hati ya
dharura, huku utata ukiibuka kutokana na usiri uliopo ndani ya miswada
hiyo.
Katika mkutano kati ya wadau hao na waandishi wa
habari, walisema lengo la kutoa tamko hilo ni kulitaka Bunge kusitisha
uwasilishaji wa miswada hiyo kwa utaratibu wa hati ya dharura ili kutoa
fursa kwa wadau na wananchi kuiona miswada, kuisoma, kuichambua na kutoa
maoni yao.
Walioshiriki kuandaa tamko hilo ni wadau
kutoka Baraza la Habari Tanzania (MCT), Sahara Media Group, Policy
Forum, Kituo cha Sheria na Haki za Binadamu (LHRC), Kampuni ya The
Guardian, Mwananchi Communications Ltd, Free Media Ltd, Hali Halisi
Publishers, Taasisi ya Twaweza, Mfuko wa Vyombo vya Habari (TMF),
Tanzania Citizens’ Information Bureau na Shirika la Sikika.
Hata
hivyo, Mwenyekiti wa Jukwaa la Katiba Tanzania Bara (Jukata), Deus
Kibamba alisema wadau wa habari wanaamini kuwa Serikali na Bunge
hawatakuwa tayari kupokea lawama za wananchi kwa upitishaji wa miswada
hiyo bila kufuata utaratibu wa kawaida.
“Hatutegemei
kuona Serikali ikipuuza tamko hili ila inawezekana tukachukua hatua
nyingine, endapo itashindika kwa njia hii ya tamko,” alisema.
Mkurugenzi
wa Shirika la Sikika, Irinei Kiria alisema: “Hatuamini kama Serikali
iko tayari kuona ikichonganishwa na wananchi kwa sababu ya miswada hiyo,
wabunge wetu pia hatuamini kama watakubali kuona miswada hiyo
ikipitishwa kwa hati ya dharura bila kushirikisha wadau.
“Miswada
hiyo haiwahusu wanahabari pekee, bali hata wadau wengine, hata CCM
hatuamini kama inaweza kukubaliana na upitishwaji wa miswada hiyo kwa
usiri usiojulikana kwa wahusika.”
Akijibu swali kuhusu
athari za kutaka kukwamisha miswada hiyo, Katibu wa Jukwaa la Wahariri
Tanzania (TEF), Neville Meena alisema ni heri kuzuia kuliko kuruhusu
miswada iliyojaa usiri.
Posted Sunday, March 22, 2015
