Ajali ya Majinjah yaondoka na wanafunzi watano UDSM

Waombolezaji wakiwa wameshika picha ya  marehemu Olga Ntosa mmoja wa abiria 50 waliofariki kwenye ajali ya basi la Majinjah iliyotokea eneo la Mafinga mkoani Iringa mwanzoni mwa wiki, wakati wa ibada ya mazishi iliyofanyika katika Kijiji cha Iwanga, Wilaya ya Mbeya Vijijini jana. Picha na Erick Shabani

ADVERTISEMENT

Dar es  Salaam na Iringa. Wanafunzi watano wa Chuo Kikuu cha Dar es Salaam (UDSM) ni miongoni mwa watu waliofariki katika ajali ya basi la Majinjah iliyotokea wilayani Mafinga, Jumatano baada ya kugongana na lori na kuangukiwa na kontena lililokuwa limebebwa na lori hilo.

Katika ajali hiyo iliyoua watu 50, mwanafunzi mmoja wa chuo hicho alinusurika kifo na kujeruhiwa. Mwanafunzi huyo wa mwaka wa kwanza, Tupate Mosigwa alifikishwa katika Hospitali ya Wilaya ya Mafinga lakini baadaye alihamishiwa Hospitali ya Rufaa Mbeya kwa matibabu zaidi.

Katika taarifa yake kwa Umma, Makamu Mkuu wa Chuo hicho, Profesa Rwekaza Mukandala aliwataja wanafunzi waliopoteza maisha kuwa ni Eric Killeo (mwaka wa tatu), Daud Sosten (mwaka wa tatu) na Jeremia Watson (mwaka wa pili).

Wengine ni Frank Mbaule (mwaka wa pili) na Didimo Chiwango (mwaka wa tatu). Profesa Mukandala alisema miili ya marehemu hao ilitambuliwa na ndugu zao na kuchukuliwa kwa ajili ya maziko.

“Uongozi wa chuo unatoa pole kwa wanafamilia wote pamoja na jumuiya ya chuo kikuu. Pia, tunamtakia mwanafunzi mwingine Rafael Norbert apate nafuu baada ya kujeruhiwa katika ajali hiyo,” alisema mkuu huyo wa chuo.

Aliongeza kuwa, uongozi wa chuo kwa kushirikiana na viongozi wa Mkoa wa Iringa, wanaendelea kufuatilia kama kuna wanafunzi wengine waliokuwamo kwenye basi hilo lililochukua maisha ya watu wengi.

Wakati huo huo, watu kutoka nchi jirani ya Malawi wamefika nchini kwa ajili ya kutambua miili ya ndugu zao kama ni miongoni mwa watu waliokufa katika ajali hiyo.

Ujio wa watu hao ambao walifikia katika ofisi za ubalozi mjini Dar es Salaam na baadaye kwenda katika ofisi ya Mkuu wa Mkoa wa Iringa, umekuja huku miili ya watu wawili kati ya watu 50 waliofariki dunia katika ajali hiyo ikiwa bado haijatambuliwa.

Mganga Mkuu wa Mkoa wa Iringa, Robert Salim  aliliambia gazeti hili kuwa hadi sasa miili 48 imeshatambuliwa na ndugu zao na imesafirishwa kwa ajili ya maziko, huku akisisitiza kuwa hospitalini zimebaki maiti mbili tu ambazo hazijatambuliwa.

Akifafanua kuhusu majeruhi, Dk Salim alisema hadi jana katika Hospitali ya Rufaa ya Mkoa wa Iringa walikuwa wamebaki watu tisa waliokuwa wanaendelea na matibabu, saba wakiwa katika Hospitali ya Rufaa ya Mkoa wa Iringa na wawili katika Hospitali Wilaya ya Mufindi.

Imeandaliwa na Geofrey Nyang’oro, Zainab Maeda na Peter Elias.