Tumia vipaji ulivyopewa na Mungu ufanikiwe maishani

Miongoni mwa tunu muhimu za mafanikio ambazo Mungu amewekeza ndani ya kila mtu ni vipawa.

Kwa bahati mbaya na pengine kwa kutojua umuhimu wa vipawa, watu wengi hawatilii maanani vipaji walivyonavyo.

Wengi wanaishi kwa kuiga maisha ya watu wengine kana kwamba wao ni nakala ya wengine. Kipaji chako ni utajiri mkubwa kama utaamua kukitumia ipasavyo.

Kipaji ni umahiri wa kipekee alioweka Mungu ndani ya akili ya mtu unaoongoza usadifu wa viungo na fikra zake kufanya jambo fulani kwa upekee kabisa.

Ni talanta ambazo mtu anazo siyo kwa sababu kasomea bali ni ujuzi wa kuzaliwa nao, elimu inasaidia tu katika kumfanya atumie kipaji chake kwa ufanisi na kwa manufaa zaidi.

Kwa mfano, michezo mbalimbali, sanaa kama muziki, kuchora, kucheza mpira, kuimba, kusanifu, kubuni programu za kompyuta, mitandao, kuchonga ni vipaji. Wanachotakiwa kufanya ni kufanyia kazi vipaji vyao.

Watu mashuhuri na waliofanikiwa ni wale waliotumia vipaji vyao vizuri. Kuna mifano hai kama Filbert Bayi wa Tanzania alitumia talanta yake ya kukimbia mbio.

Wanamuziki kama vile, Rose Muhando wanatumia sauti yao kufanikiwa. Na hata wachezaji maarufu duniani wanatumia vipaji vyao kucheza mipira wanafanikiwa kuliko hata wasomi wenye shahada lukuki.

Wasanii na wana michezo wengi ni miongoni mwa watu maarufu na matajiri duniani, japokuwa wengi hawana elimu kubwa kiasi cha kushangaza, walichofanya ni kutumia vipawa vyao kama ipasavyo.

Mungu alituumba na vipaji na talanta nyingi tofauti ili tuvitumie kufanikiwa maishani. Kila mtu ana talanta yake imejificha ndani ya umaizi wa akili yake.

Tunahitaji kuziibua ziliko talanta hizo na kuzitumia huku tukibadili mitazamo na kasumba.

Huwa nasikitika kumsikia Mtanzania anasimama kwenye chombo cha habari akidai yeye ni masikini na anahitaji msaada.

Wakati huo kafunika talanta zake kibindoni, na nyumbani kaacha ardhi kubwa, misitu mingi na hata watoto wengi ambao ni nguvu kazi muhimu katika kuchangia maendeleo.

Wapo Watanzania wanaodiriki kusema “sisi tutabaki kuwa maskini hivi hivi” na wengine wanadai umaskini wao ni mpango wa Mungu. Huu ni uongo! Na ni dhambi.

Mungu angetaka sisi tuwe maskini asingetupa ardhi kubwa, asingetupa mvua nyingi na maji mengi, asingetupa samaki wengi, asingetupa madini, asingetupa ndege na wanyama wengi wa mwituni.

Mungu alitupatia hivi vyote ili tuwe matajiri tuwasaidie na wale wanaoishi nchi zenye mawe tu, nchi zisizo na bahari, msitu, mto wala bwawa. Sisi siyo maskini kamwe!

Pia kiongozi au mwanasiasa anayetamka kuwa Tanzania ni masikini (wakati yeye ni tajiri) huyo ni mpotoshaji. Tusiwafundishe watoto wetu mtazamo hasi hata kama tuna changamoto.

Kuwa na matatizo ni sehemu ya changamoto za maisha, tunapaswa kuzikabili. Maana hakuna mtu au nchi inayejitosheleza.

Ndio maana hata hao walioendelea huko Ulaya bado wanakuja kwetu kununua malighafi ili wakatumie kwao.

Tena nadhani hata walioita Mkakati wa Kukuza Uchumi na Kupunguza Umaskini (Mkukuta) walikosea sana. Ingefaa ukaitwa “Mkakati wa Kukuza Uchumi na Ustawi wa Maisha ya Watu”.

Kuutaja umaskini wakati tumo ndani ya utajiri mkubwa na neema nyingi ni kujitafutia laana ya kudumu.

Maana kama tunakubali sisi ni maskini kamwe hatuwezi kuweka mikakati ya maendeleo. Tutabaki na mikakati ya kimaskini.

Nafadhaishwa pia na mtazamo unaotaka kuzoeleka hapa Tanzania miongoni mwa vijana kuwa mtu yeyote akifanikiwa kumiliki nyumba nzuri, shamba zuri lenye mavuno mengi, gari zuri, kiwanda na hata kuwa na elimu nzuri anaitwa fisadi; yaani mwizi.

Unakuta vijana wenye nguvu wanapita makazi ya watu wenye nyumba nzuri wanasema “umeyaona mahekalu ya mafisadi?”

Wanasema hivyo wakimaanisha kuwa kila nyumba nzuri, kiwanda kikubwa, shamba kubwa ni la fisadi au mwizi. Kwao; maendeleo ni wizi siyo jitihada za kazi.

Hawa wamepotoka, umasikini siyo mpango wa Mungu wala siyo ngozi ya kuzaliwa nayo isiyobadilika.

Hata vitabu vitakatifu kama vile Biblia na Quran vimesema wazi kwamba umaskini siyo mpango wa Mungu.

Mungu anataka kila mtu aishi maisha mazuri yenye ustawi, huku akimpenda na kutii mwongozo wake. Kila binadamu anahitaji maisha bora.

Kila binadamu anahitaji kulala pazuri, kula vizuri, kusafiri vizuri, afya bora, kupata elimu bora, mazingira safi, kucheza pazuri na kufurahia maisha kwa jumla. itaendelea

Watu wanakuwa kwenye shida kama vile kuishi katika nyumba mbovu na kula chakula kibaya au kisichotosheleza siyo kwa sababu wao wanapenda, au kudhani kuwa masikini ndiyo sifa ya uadilifu. La hasha! Ni kwa sababu hawana.

Fikra za kuyaona maendeleo ya mtu au kikundi cha watu ni ufisadi , ni dalili ya kupoteza dira na kukosa matumaini kuelekea ufukara wa kudumu na dhiki kuu. Itaendelea