Simba yaendeleza ubabe kwa Yanga

Mashabiki wa Simba wakishangilia huku wakiwa wamebeba mfano wa jeneza baada ya timu yao kupata ushindi wa bao 1-0 dhidi ya Yanga jana kwenye Uwanja wa Taifa. Picha na Said Khamis     

Dar es Salaam. Mshambuliaji Emmanuel Okwi alitumia juhudi binafsi kumtungua kipa, Ally Mustapha katika dakika ya 51 na kuipa Simba ushindi mnono wa bao 1-0 dhidi ya wachezaji 10 wa Yanga jana kwenye Uwanja wa Taifa, Dar es Salaam.

Okwi alipokea pasi ndefu kutoka kwa Juuko Murshid aliyempoka mpira Simon Msuva aliyeshidwa kutuliza kona fupi aliyopigiwa na Haruna Niyonzima kabla ya kutoa pasi kwa mfungaji ambaye alimwangalia kipa Mustapha aliyekuwa ametoka golini na kupiga shuti la umbali wa mita 35, na kujaa wavuni.

Bao hilo la Okwi lilitibua kabisa rekodi nzuri ya Mustapha aliyokuwa nayo, hali iliyofanya baada ya filimbi ya mwisho Barthez kuangua kilio na kudondoka chini hadi pale meneja wa Yanga, Hafidh Saleh alipokwenda kumwinua na kumsindikiza kwenda vyumba vya kubadilishia nguo.

Yanga iliyoshindwa kabisa kwenda na kasi ya Simba iliyokuwa ikicheza kwa kujiamini ilipata pigo jingine dakika ya 71, wakati kiungo wake Niyonzima alipopewa kadi ya pili ya njano na kutolewa nje kwa kadi nyekundu na mwamuzi Martin Saanya ambaye katika mchezo huo alitoa kadi za njano tisa, Simba wakipata kadi tatu na sita kwa Yanga pamoja na nyekundu.

Simba ilianza mchezo taratibu na kutawala sehemu ya katikati ya uwanja kwa kugongeana pasi fupi fupi huku viungo wake Jonas Mkude, Abdul Banda, Ramadhani Singano na Ibrahimu Ajibu wakiwazidi ujanja wenzao wa Yanga.

Yanga ambayo imekuwa ikitumia winga wake wenye kasi kufanya mashambulizi, Msuva na Mrisho Ngassa ambao katika mchezo huo walishindwa kutamba kutokana na ubora wa mabeki wa pembeni wa  Simba, Kessy Ramadhani na Mohamed Hussein.

Hata hivyo nafasi chache ilizopata Yanga kupitia washambuliaji wake Msuva, Ngassa, Amiss Tambwe walionekana kukosa umakini na mashuti yao mengi yaliishia mikononi mwa kipa Ivo.

Kocha wa Yanga, Han Pluijm alilazimika kumtoa Danny Mrwanda baada ya kupewa kadi ya njano na nafasi yake kuchukuliwa na Hussein Javu ambaye alisaidia kuimarisha safu ya ushambuliaji ya Yanga ambayo ilikosa bao dakika ya 36, baada ya krosi ya Javu kumpita Tambwe na kumkuta Ngassa ambaye alipiga shuti hafifu lililookolewa kwa miguu na Ivo kabla ya Msuva kupiga shuti lililopaa juu.

Hadi mapumziko mwamuzi Martin Saanya alitoa kadi saba za njano, tatu kwa Simba na nne kwa Yanga kutokana na vitendo vya utovu wa nidhamu vilivyoonyeshwa na wachezaji wa timu zote mbili.

Mara baada ya mechi kumalizika kocha wa Yanga, Pluijm alisema Simba ilikuwa na bahati, lakini pia ilicheza mpira wa nguvu kulinganisha na timu yake, hivyo wanajipanga kwa mchezo ujao wa ligi.

Taulo la Ivo

Mwamuzi Saanya alilazimika kumzuia kipa wa Simba, Ivo asining’inize taulo lake katika goli kutokana na imani za kishirikina zinazotawala katika mchezo huo.

Kwa nini Yanga huwa inazidiwa na Simba?

Simba hata kama itakuwa katika kiwango dhaifu huwa inafanya maandalizi makubwa kujiandaa dhidi ya Yanga kuliko inavyojiandaa na mechi yoyote ile labda jambo hilo nalo linachangia kuwapa wakati mgumu wapinzani wao pindi wanapokutana.

Lakini jambo jingine linalochangia Yanga kuwa na wakati mgumu katika mechi dhidi ya Simba ni kwamba wanakuwa katika presha kubwa ya mchezo kuliko Simba ambao huwa wanatulia, Yanga huwa na wasiwasi.

Msimu uliopita kwenye Ligi Kuu Bara, Simba ikiwa dhaifu, lakini ilitoka sare ya mabao 3-3 na Yanga, mabao ya Yanga yakifungwa na Mrisho Ngassa na Hamis Kiiza aliyefunga mawili wakati ya Simba yalifungwa na Betram Mwombeki, Joseph Owino na Gilbert Kaze.

Mzunguko wa pili timu hizo zilitoka tena sare ya bao 1-1, bao la Simba likifungwa na Harun Chanongo wakati la Yanga lilifungwa na Simon Msuva.  

Lakini Simba iliyokuwa dhaifu iliibuka mbabe mbele ya Yanga iliyokuwa katika ubora wake kwa kuinyuka mechi zote mbili za Nani Mtani Jembe kuanzia mwaka juzi walipoifunga Yanga mabao 3-1 na mwaka jana waliichapa mabao 2-0.

Awali timu ya vijana wa Simba iliisambaratisha Yanga kwa kuinyuka kwa mabao 4-2 ushindi ulioamsha shangwe kwa mashabiki wa Simba.

Tanga. Mgambo Shooting ilitumia vizuri uwanja wake wa nyumbani kwa kuichapa Ndanda FC kwa mabao 3-1 kwenye Uwanja wa Mkwakwani.

Mgambo ilipata mabao yake kupitia Salim Aziz Gilla aliyefunga mabao mawili dakika ya 14 na 70, Malimi Busungu (26), wakati Ndanda ilipata bao lake kupitia Gideon Benson (44).

Wakati Mtibwa Sugar ililazimishwa sare 1-1 na Mbeya City kwenye Uwanja wa Manungu.

Vikosi

Simba: Ivo Mapunda, Kessy Ramadhani, Mohamed Hussein, Hassan Isihaka, Juuko Murshid, Abdi Banda/Simon Sserunkuma, Ramadhani Singano, Ibrahimu Ajibu/ Elius Maguri, Said Ndemla na Emmanuel Okwi.

Yanga: Ally Mustapha, Mbuyu Twite, Oscar Joshua, Nadir Haroub, Kelvin Yondani, Said Juma, Simon Msuva, Haruna Niyonzima, Amissi Tambwe, Mrisho Ngassa/ Kpah Sherman na Danny Mrwanda/ Hussein Javu.