Dk Shein awataka vijana CCM kuepuka fujo
Mgombea
urais wa Zanzibar kwa tiketi ya CCM, Dk Ali Mohammed Shein akizungumza
katika moja ya mikutano ya chama hicho. Picha na Maktaba
Pemba. Mgombea urais wa Zanzibar kwa tiketi
ya CCM, Dk Ali Mohammed Shein amewataka vijana kutokukubali kutumiwa
kufanya fujo na kwamba Serikali itahakikisha uchaguzi unakuwa huru na wa
haki.
Kauli kama hiyo ilitolewa na mpinzani wake,
Maalim Seif Sharrif Hamad ambaye aliwataka wafuasi wa chama chake cha
CUF kutokubali kuingia kwenye vurugu akidai kuwa CCM imepanga
kuwachokoza ili wafanye fujo.
Jana, Dk Shein aliyekuwa
akizungumza katika mkutano uliofanyika kwenye Uwanja wa Gombani ya Kale
na kuhudhuriwa na mgombea urais wa Jamhuri ya Muungano wa Tanzania, Dk
John Magufuli, aliwataka vijana kutokubali kutumiwa kufanya vurugu
katika uchaguzi utakaofanyika Oktoba 25.
“Wananchi
msiwe na hofu, uchaguzi utakuwa huru na wa haki. Hakuna fujo yoyote
itakayotokea,” alisema Dk Shein ambaye anawania kuongoza visiwa hivyo
kwa kipindi kingine cha miaka mitano.
Alisema
anasikitishwa na vitisho wanavyopewa wafuasi wa CCM wakati walipokuwa
wakifanya maandalizi ya mkutano wa Dk Magufuli kisiwani Pemba.
Dk
Shein aliwaambia wakazi wa Pemba kuwa atahakikisha wanakuwa na meli
kubwa ya uvuvi ili wavuvi waweze kufika bahari kuu kuvua samaki kwa
urahisi.
Akizungumza katika mkutano huo wa kampeni, Dk
Magufuli alisema Serikali atakayoiongoza itaimarisha sekta ya uvuvi na
kuifanya Zanzibar kuwa kitovu cha biashara ya samaki kwa nchi za Afrika
Mashariki na dunia.
Alisema Zanziba ina rasilimali ya samaki ambayo inahitaji mipango madhubuti ili iweze kutoa ajira kwa vijana.
“Hilo litawezekana mkinichagua kuongoza nchi. Zanzibar itakuwa soko kuu la samaki duniani,” alisema Dk Magufuli.
Dk Magufuli aliwataka wananchi wa Pemba kuacha jazba za siasa na kuweka mbele maslahi yao na maendeleo ya nchi yao.
Aliahidi kudumisha Muungano akimtaja mgombea mwenza, Samia Suluhu Hassan kuwa suluhisho la kero za Muungano.
“Msifanye makosa Oktoba 25,” alisema Dk Magufuli.
Katika
mkutano huo ambao umevunja rekodi kwa kuhudhuriwa na maelfu ya
wananchi, Dk Magufuli alipokea wanachama wapya 80 kutoka CUF.
Alisema
kwa kushirikiana na Dk Shein ataongeza kasi ya kuimarisha huduma za
kijamii, kama barabara, afya, elimu pamoja na mawasiliano.
Kwa upande wake Balozi Seif Ally Idd aliwataka wananchi wa Pemba kuwachagua wagombea wa CCM ili waendeleze kasi ya maendeleo.
Posted Friday, October 16, 2015 | by- Masanja Mabula, Mwananchi
