Adam Kimbisa awawakia watendaji ‘wanaokumbatia wagombea urais’
Mjumbe wa Halmashauri Kuu ya Taifa ya Chama cha Mapinduzi ambaye pia ni Mwenyekiti wa chama hicho Mkoa wa Dodoma, Adam Kimbisa.PICHA|MAKTABA
Dodoma. Mjumbe wa Halmashauri Kuu ya Taifa
ya Chama cha Mapinduzi ambaye pia ni Mwenyekiti wa chama hicho Mkoa wa
Dodoma, Adam Kimbisa amewataka watendaji wa CCM kukaa ofisini kufanya
kazi badala ya kuzunguka mikoani kusafisha njia ya wagombea urais.
Kauli
hiyo ya Kimbisa imekuja siku chache kabla ya CCM kupuliza kipenga cha
kuchukua fomu za kuwania uongozi katika Uchaguzi Mkuu.
Kimbisa alisema hayo alipofungua kikao cha Halmashauri Kuu ya Taifa(Nec) ya chama hicho jana.
Alisema baadhi ya wajumbe wa chama hicho wametwishwa mgombea urais wanayezunguka naye kila mkoa kumfanyia kampeni.
“Kuna
watu wanapita huko wanahangaika, wanasumbuliwa na posho za wagombea
urais. Sasa wewe kama ni M-nec au katibu unaachaje eneo lako tupu
unahangaika na la wenzako?” alihoji.
Pia alihoji kuwa
wanapofanya hivyo, madiwani wao watawapitishaje kuwania nafasi
mbalimbali za uongozi kama wao wanahangaika na wagombea urais.
“Ningependa
kuona mnahangaika katika kata zenu badala ya kwenda Mwanza na wagombea
urais. Nasema hangaikieni kule kwenye kata na mitaa tulikopigwa katika
uchaguzi uliopita, fanyeni ‘mishemishe’ tupite huko,” alisema na
kuongeza kuwa:
“Sasa unajitwishaje mgombea urais
aliyetoka madongo kuinama, humjui, hakujui, unahangaikia posho, njaa
imekubana, unamsimulia mambo ya mgombea urais mchana kutwa... ya kwako
yamekushinda. Tuache njaa na tamaa, tushughulike na maeneo
tuliyokabidhiwa na wananchi.”
Hata hivyo, Katibu wa
Itikadi na Uenezi wa chama hicho Mkoa wa Dodoma, Donald Mejitii alisema
kikao hicho kimetokana na azimio la kuwataka viongozi kufanya kazi
katika maeneo yao.
“Fanya siasa za nyumbani, simamia utekelezaji wa
maendeleo ya wananchi wako na chama katika wilaya yako badala ya kwenda
Tanga na kuanza kuwanadi wagombea urais,” alisema.
Katika kikao hicho Kimbisa alisema wanachama wanaofanya hivyo, wanaua Mkoa kichama kwa kuendekeza tamaa na njaa.
Alisema viongozi wanaofanya hivyo, wanatumia matumbo kufikiri kuliko kichwa na hivyo kulifanya tumbo kuwaendesha.
“Nawaombeni
sana tusitumike, mapenzi yako yasikuhamishe kwenye eneo la kazi, sasa
unakwenda Mtwara unajaa vumbi hadi kope zote za macho hazionekani tena,
huku ukimnadi mgombea wako,” alisema.
Pia aliwataka
viongozi wa CCM kujisahihisha kwa kuvunja makundi ndani ya chama.Alisema
kwa bahati mbaya wanamakundi mengi yanayoanzia katika ngazi ya matawi
hadi Wilaya.
“Kwenye Wilaya tuna makundi mengi sana,
unaweza kuwakuta pia viongozi tunaowategemea wamo, katika sehemu nyingi
watu hawaelewani hawasikilizani na hasa kipindi hiki,” alisema na
kuongeza:
“Ni lazima tujitahidi tusipovunja makundi, tukienda vipande vipande nafasi ya ushindi ni ndogo sana.”
Alisema
kwa kuvunja makundi itawasaidia katika kuondoa kero za wananchi, huku
akiwataka kuacha siasa za mazoea ili kujiweka sawa katika siasa za
mapambano na watani zao.
Kimbisa aliwataka viongozi hao kutumia haki na kuacha kushupalia ndugu na jamaa hata kama hawafai kugombea katika uchaguzi.
